桥唔怕旧，最紧要受？广州富力（足智彩译广州RF）今午喺亚冠盃外围赛作客悉尼，挑战澳职下游球队中岸水手，呢支中超上届季军唔止悬赏1,000万人仔争晋级，仲刻意抄恒大旧桥，整咗张「惊涛拍岸」宣传海报（上图），似乎想複製恒大嘅赢波历史，但係由现实环境去睇，博2.03倍半场和应该係最实际。
悬赏千万人仔争晋级
富力、水手今日边队Win出，就可以跻身亚冠盃正赛，同日本大坂飞脚、南韩城南一和、泰国武里南联争逐F组出线权。论亚冠经验，水手肯定丰富过富力，而且呢班波不嬲唔赦中超球队，2012年佢哋主场5:1打爆天津泰达，13年主客场都赢贵州人和2:1，14年主场1:0险胜北京国安、唯独一次输波，就係13年主场1:2不敌广州恒大。富力班职员可能记得当年恒大张海报就係用「惊涛拍岸」做主题，今次除咗重赏千万仲不惜「侵权」照抄，显然係想第一次打入亚冠盃正赛。
不过，打波係靠脚头唔係意头，入唔到波乜都唔使谂。富力改咗由前基达菲主帅高士曼干查执教之后，着力改善防守，阵式由艾历臣时代嘅「4-4-2」，变咗「4-2-3-1」同「4-1-2-2-1」之间，中场屯兵更重，但係上星期3:0淘汰新加坡勇士场波，富力都要摆无锋阵，高士曼干查亦坦承队波前线把握力不足，依家外边都一直传闻，富力斟紧科特迪瓦个U20前锋奎斯。
攻击力未如理想，至弊係水手嗰阵体力化打法，向来都係富力至惊嗰隻，而且水手后衞保斯拿前年効力过富力，对呢班波好清楚，有埋地利嘅水手，虽然走咗唔少主将，富力一开波都未必敢乱咁攻，博「半和」啦。
