几支上周末出战英足盃嘅英冠球队今晚进行补赛，打比郡喺英足盃主场踢少个嘅情况下被雷丁淘汰，体力、士气皆受损，今次作客对住仲要抢分护级嘅洛达咸冇甜头，打比郡让波必捧让球主胜。
（周三凌晨3时45分开赛）
打比郡上场英足盃对雷丁有守将禾诺克上半场领红牌被逐，整个下半场要十人应战，结果战至末段被对手耶高保攻入致胜一球落败，相隔三日作客再战，体力上蚀晒章。洛达咸现时只比尾三嘅米禾尔多三分，仲未摆脱降班威胁，佢哋对上两场主场联赛先后击败保顿及叶士域治，表现不俗，养精蓄锐之下有力抢分，受让捧得过。
韦根后防穿窿雷丁可捧
另外两场赛事，布力般流浪喺英足盃反胜英超史笃城赢尽掌声，不过今次作客未必恶得出样，卡迪夫城门将大衞马素尔复出，防线表现稳定咗好多，捧细盘。最后雷丁主场对韦根，韦根最近七场联赛未赢过，而且对上两场都要失三球，防线穿晒窿，捧雷丁主W。
