法达斯维：云格领兵降摩
君子报仇廿年未晚！
今晚欧联16强首回合上演复仇之战，「兵工厂」阿仙奴主场火併法甲劲旅摩纳哥。「教授」云格当年对摩纳哥有情有义，可惜畀个良心当狗肺遭无情炒鱿，塞翁失马焉知非福，反而喺阿仙奴落地生根名扬天下，事隔二十年后重遇无良旧东家，无论为阿仙奴洗脱「欧联16哥」恶名，定係为自己争番啖气，云格誓要大胜一场威番铺，斯维力撑让球主胜。
(有线61及64台周四凌晨3时45分直播)
当去年年尾欧联16强抽籤阿仙奴抽中对摩纳哥时，主帅云格一定百般滋味在心头，1987至94年间，「教授」正係执教呢支法国劲旅，唔单止勇夺联赛及法足盃等锦标，佢以个人魅力先后说服到荷杜、史斯富、奇连士文等球星加盟，并培养出世界足球先生韦亚等可造之材，打出漂亮嘅进攻足球，94年更获得德甲班霸拜仁慕尼黑力邀过档，但摩纳哥坚决唔放人，云格亦有情有义决定留队。点知前后唔够几个月，94-95年球季因为开咧跌落下游，摩纳哥立即变脸怒炒云格，搞到忠心耿耿嘅「教授」一度心灰意冷，若非后来远赴日本接手名古屋八鲸，犹如「心灵假期」般医好其内心伤痕，重拾对足球嘅兴趣，佢随时早已退出球坛，亦冇之后在阿仙奴嘅辉煌事迹。
决洗欧联16哥污名
塞翁失马焉知非福，96年云格来到阿仙奴后，将呢支「鱼生粥部队」嚟个华丽转身，塑造成英超最好睇嘅兵工厂，04年不败夺冠更堪称经典，唔经唔觉，今年係「教授」在阿仙奴嘅第19个年头，为现役执教时间最长嘅英超领队，上年更拒绝摩纳哥邀请回巢。不过，这名曾在欧洲三大盃（欧联、欧洲盃赛冠军盃及足协盃）决赛落败嘅一代宗师，依然对欧联锦标念念不忘，阿仙奴近四届一踏入淘汰赛首圈即行人止步，更被嘲笑为「欧联16哥」。
摩纳哥靠小将撑场
好彩，云格嘅旧东家摩纳哥已今非昔比，老闆鲁博洛夫列夫闩水喉之馀，去夏仲将哥伦比亚球星占士洛迪古斯高价售予皇马，法卡奥又借埋畀曼联，阵中剩番「hea碧」贝碧托夫同摩天奴较有级数，靠法宾奴泰华利斯、贝拿度施华、马菲斯卡维奴等小将担大旗，踢法甲都仲勉强OK，嚟到水准更高嘅欧联就窄窄哋，加上中场重心杜拿兰要坐波监，实力大削。相反阿仙奴之前九仗主场比赛赢晒，当中有六场赢两粒或以上，阿历斯山齐士、奥斯尔、辛迪卡索拉、基奥特于前线穿花蝴蝶般嘅配合，既好睇又实际，佢哋亦想为「教授」报番当年炒鱿之仇，火力全开唔係人咁品，让球主胜咪错过。
