亨格比利：利物浦上盘抵锡
重临伊斯坦布尔福地
10年前嘅伊斯坦布尔奇迹之夜，相信球迷依然记忆犹新，当年嘅奇迹创造者利物浦，今晚会喺欧霸盃32强次回合造访比锡达斯，又係嚟番呢个夺冠福地，相信「红军」肯定想重温好梦。利物浦呢期重新起飞，佐敦伊比、史达宁同菲腊比古天奴3隻生牯仔又当Fit，让防线甩皮甩骨嘅比锡达斯平半，梗係要撑1.95倍上盘啦！
（有线61及201周五凌晨2:00直播）
利物浦最近强势没法挡，最近19场波只曾一败，对上10场英超更加未输过，证明冇咗「神奇队长」谢拉特都冇问题。「红军」唔声唔声弹番上英超前列，重燃争入前四希望，全队上下当然个个心雄。首回合Lead住1粒嘅利物浦，今晚有翼锋拿沙马高域停赛，不过呢位塞尔维亚国脚状态麻麻，预计领队罗渣士搵番史杜列治担正，侵略性仲强。
比锡达斯丹巴巴亚或倦勤
查实「红军」呢期走势咁好，3隻矮脚虎佐敦伊比、史达宁同菲腊比古天奴好大功劳，啱啱上位嘅伊比能传擅射又爆得，史达宁就可翼可锋，加埋个脚法细腻兼有远射脚头嘅古天奴，利物浦嘅攻势都几难顶。
10年前利物浦就係喺伊斯坦布尔个阿塔图尔克球场上演奇迹，落后3球反胜AC米兰捧走欧联锦标，咁啱得咁跷，比锡达斯个新球场未Ready，家阵暂时用住阿塔图尔克球场，睇嚟连个天都想利物浦喺度赢多铺！呢个场可以容纳7.6万人，比锡达斯为壮声威，特登将今仗波飞标价10镑益街坊。可惜吖，佢哋个首席射手丹巴巴亚小腿受伤，今仗未必披甲，左闸拉蒙莫达同中坚阿辛古林就要坐波监，加埋头号门将杜加辛坚又养紧伤，天残地缺点同「红军」鍊？
