今晚西甲有2支同样由德国返归嘅欧战劲旅对碰，西维尔主场迎战「3哥」马德里体育会。佢哋周中远征德国命运迥异，西维尔砌低慕逊加柏跻身欧霸盃16强；相反，马体会就喺欧联16强首回合不敌利华古逊，虽然马体会实力较高，但连续两场作客体力输蚀，今晚胜负难料，不如转玩2.19倍入球大仲好。
（now632台周一凌晨2:00直播）
西维尔争前4焗抢攻
西维尔喺上轮联赛作客皇苏，竟然临天光连环失守输3:4，家阵已经落后第4位嘅华伦西亚5分，争欧联入场券形势落入下风，之后每场波唔攻唔掂，就算呢铺斗马体会都唔慌会踢得保守。况且箭头卡路士巴卡状态劲弗，近4场波入3粒，中场马捷恩佩雷斯对慕逊加柏亦梅开二度，计落有一拚之力。如果要搵西维尔嘅弱点，就係佢哋条防线实在太曳，唔计今轮联赛，斋计西甲前8队，佢哋失波係最多嗰队，最近2仗仲狂失6球，与其死守不如豁出去驳火仲有着数！
另边厢，马体会嘅表现亦不及上季，去到客场嗰阵班波集中力仲差，搞到近6次客战输4铺，好在条锋线仲保持到效率，一对拍档法国国脚基沙文及文迪苏杰，合共交出26个联赛士哥，加埋季中回巢复勇嘅「王子」费兰度托利斯，火力唔讲得笑，既然两军同样攻强守弱，点计入波都唔会少啦！
