双箭头Ready迎美职开锣
美职听朝劲爆开锣，衞冕总冠军嘅洛杉矶银河喺主场招呼芝加哥火燄，入球大值得吼实。虽然银河有当路云退役，新Icon谢拉特又未归队，不过队长罗比坚尼已准备好攞威，拍住萨迪斯攻坚锋力有番咁上下，撞正火燄前线实力强化，有条件夹计开大骚。
（开赛时间：周六早上11:00）
由于劳资问题，今季美职曾经传出会停摆，幸好最后顺利开锣，最开心梗係一班球迷啦！力求衞冕总冠军嘅洛杉矶银河，明早会为美职打头阵，新签入嘅利物浦队长谢拉特未归队的确可惜，不过银河嘅主场入座率向来劲高，冇谢拉特一样大把人撑，而且佢哋前线组合罗比坚尼同萨迪斯，上季喺常规赛携手攻入35球，唔使担心佢哋开锣战食白果。
罗比坚尼拒让臂章
银河队长罗比坚尼赛前就喺twitter晒命，上载佢戴住美职冠军指环嘅相。上季佢喺季后赛决赛加时入波搞掂新英伦革命，仲当选埋最有价值球员，开季前话明唔会将队长臂章交畀谢拉特，讲得咁口响，睇得出佢已经准备好迎接新球季，咁饿波梗係要入多几球证明实力啦！
火燄射手有料到
至于对手芝加火燄，季前放走表现令人失望嘅射手安梳尔同庞高尼，取而代之係希尔星堡射手艾卡姆同AIK苏纳前锋伊保拿尼基，佢两个分别来自加纳同尼日利亚，艾卡姆上季更加喺瑞超攻入16球，就算王牌马基养紧伤唔踢得，火燄都有足够兵力同银河斗入波，睇怕佢两队唔会喺美职开锣战就踢闷波赶客啩？
