雷法尔：圣罗伦素圣保罗做大骚
圣罗伦素今季喺联赛表现出色，偏偏喺南美自由盃B组正陷出局边缘。听朝呢支阿甲榜首将会喺主场迎战圣保罗，再唔赢波睇怕佢的随时要执定包袱，呢铺唔攻唔得。至于圣保罗教练拉马奴赛前放风指要K.O.对手，摆明一副「驳火格」，2.45倍入球大抵玩。
（开赛时间：周四早上6:45）
先讲B组目前形势，哥连泰斯3战全胜排榜首，圣保罗则以3分之差力压得3分喺手嘅圣罗伦素屈居次席。若然圣罗伦素今次赢唔到，出线形势将会更加被动，点到佢的唔搏。虽然前锋维拿巴尚未复操，好在球队另一箭头莫路麦图斯脚风够顺，近2仗共入3粒，配合上仗打破入球荒信心大增嘅卡奥达奥斯奥攻坚，圣罗伦素锋力依然有保证。
圣保罗讲明抢攻
另边厢圣保罗亦唔想夜长梦多，赛前教练拉马奴表示唔想打单箭头咁保守，有意搵射手柏图（左图）拍住卡亚迪斯大踢进攻足球，仲扬言话要砌低对手，尽快锁定出线席位，加上巴西国脚中场祖斯夫苏沙赶及归队，呢铺就算作客都唔赦对手。
